Friday, November 14, 2008

More Financial woes

http://www.jordan-business.net/magazine/index.php?option=com_content&task=view&id=278&Itemid=40


أستاذ مروان

بدي اعلق على المقابلة تاعت مدير البنك المركزي، يا زلمه ما جاوب ولا على سؤال من ألأسئله الي انت سألته إياها، مع انه ربنا الله الواحد يحكي دينه، اسئلتك كانت جامده وفي الصميم، بس شو الفايده، كل الجوابات كانت لا تمت بصله لأي سؤال. ممكن يعني انك تلخص كل اجوبته بجمله واحده وهي انه كل اشي مبني على المسأله او المسائل التجريبيه وغير هيك مافي اشي تاني، وكل قارئ للعدد يفهم ألأجوبه زي مابده. اتركنا من مقدمة المقال وخلينا ندخل مباشره في موضوع ألأسئله. انت بتقول له انه خبراء ألأقتصاد اختلفو في ما بينهم على مدى تأثير ألأزمه الماليه على اقتصاد ألأردن، هو شو برد وبقولك، على المدى القريب النتائج رايحه تكون ايجابيه حتى في عجز الحكومه المالي. ثم يستطرد ويقول ان البنك المركزي يقوم بتجارب لدراسة مدى تأثير الصدمه وكأن الصدمه لم تحدث بعد او انها بصدد انتظار نتأئج ابحاث المركزي المستقبليه. ألسؤال الثاني كان حول ازمة العقار ومدى استعداد البلد لمواجهته، والجزء ألأخر من السؤال له علاقة بهروب المستثمرين من بورصة عمان. شو هو جاوب، أول شي ترك موضوع سقوط العقار بحاله ولم يتطرق له نهائيا، ومن ثم اجاب عن البورصات الأجنبيه ولم يتطرق الى سبب هروب المستثمرين من بورصة عمان او سبب انعدام الثقه عندهم في وقت يجزم بأن المشكله الرئيسيه هي خارج البلد وليس بداخله. ألسؤال الي بعده انت بتقول انه البنوك في الأردن في السنوات القليله الماضيه صارت تعطي قروض بسهوله وزي الحلاوه ويمكن كان قصدك انه كيف هادي الناس هسه بدها تسد جبل الديون الي تراكم على روسهم، هسه هو شو رد وقال لك نحنا في المركزي ما عندنا مشكلة سيوله وعندنا اجرأت مراقبه صارمه والناس اهل الثقه رايحين يضلو يقدرو يحصلو على قروض. ألسؤال الي بعده، انت بتقول انه ألأزمه الماليه وانهيار اسعار العقار سوف تضعف من حجم ألأستثمارات في ألأ ردن، شو هو برد وبقول لك طالما انه احنا هون عنا ضوابط قويه وطالما انه التضخم مسيطر عليه وطالما الوضع الداخلي كويس معناته الدنيا بخير. السؤال الي بعده، انت بتقول له انه في تباطؤ في النمو، هو شو برد عليك وبيقول، هذا امر بحاجة الى دراسه من خلال تجارب علميه تجريبيه. انت بتسئال هل ربط الدينار مع الدولار ساعد الوضع في ظل التقلبات الحاليه، هو شو رد وقال نعم، ساعد كثير كثير، طبعا استعمل كلام اخر بس هاد كان قصده . انت بتسأل عن سعر الفائده وإزا بده يتغير، هو بجاوبك بأنه السيوله النقديه وحجم التضخم يقريران في ما اذا سوف يتغير مقدار الفائده. أنت تسأل اذا كان المركزي ينوي ضخ سيوله في البنوك ألأردنيه مثل ما ضخت مركزيات العالم كله في بنوكها، هو شو رد وقال لك احنا بنتبع البنك الدولي وكمان احنا بنروح على كل المؤتمرات وألأجتمعات الماليه التي تعقد في اي مكان في العالم او اي ركن من اركان المعموره. انت بتسئل عن فشل اليبرالين الجدد ،وهو برد وبقول لك اوضاع بنوكنا بخير والحمد لله. انت بتسئل عن موضوع الفلوس التي يرسلها المغتربين ألأردنيين العاملين في الخارج، وهو يرد عليك ويقول مرة اخرى بأن هذا امر يحتاج الى دراسات علميه تجريبيه http://www.jordan-business.net/magazine/index.php?option=com_content&task=view&id=278&Itemid=40
هذا رد على المقابلة التي اجراها السيد مروان قردوش مع السيد اميه طوقان على هذا الرابط